Koalicioni në pushtet, VLEN, i është përgjigjur BDI-së lidhur me akuzat se shqiptarët janë larguar nga postet drejtuese në Fondin e Sigurimit Shëndetësor. VLEN thotë se BDI-ja po qan pse po largohen nga institucionet dhe po humbin privilegjet.
“Gjatë ditës, drejtori i tyre në largim i FSSH-së i përshëndeti me buzëqeshje dhe u fotografua me drejtorët e rinj, ndërsa pasdite BDI-ja opozitare gjoja mendoi të shqetësohej për harmoninë ndëretnike dhe Marrëveshjen Kornizë të Ohrit. Me fjalë të tjera, ata qajnë sepse largohen nga institucionet, humbasin privilegjet dhe janë nën kërcënimin e auditimit të punës së tyre. VLEN nuk do të lejojë që të manipulohet duke krijuar një perceptim të rremë të gjoja poshtërimit institucional të shqiptarëve. BDI në vend të nxitjes duhet t’i përgjigjet opinionit se pse i kanë ofruar kryetarit të VMRO-DPMNE-së që në vend të VLEN-it të hyjë në qeverinë e tij me vetëm 4 ministri, pa kryetar të Kuvendit dhe me premtimin se do të punojnë për të në Zgjedhjet lokale 2025 fitojnë kandidatët për kryetarë komunash në Kërçovë dhe Strugë? Është koha për të vërtetën”, thuhet në reagimin e VLEN-it.
