Kryetari i Kuvendit të Republikës së Maqedonisë së Veriut, Afrim Gashi, deklaroi se nuk ka ndryshim në qëndrimin e partnerëve strategjikë të vendit. “SHBA mbetet partneri ynë i fortë strategjik. Si qeveri e re, do të duam ta thellojmë edhe më shumë këtë partneritet,” theksoi Gashi.
Gashi shtoi se është obligim dhe sfidë për qeverinë të zbatojë ndryshimet kushtetuese kur të vijë koha e duhur. Ai vlerësoi marrëdhëniet mes Maqedonisë së Veriut dhe NATO-s si të shkëlqyera, duke përmendur se vendi është anëtar i plotë i NATO-s për të katërtin vit.
Në përfundimin e Asamblesë Parlamentare të NATO-s, që u mbajt me rastin e 75-vjetorit të themelimit të Aleancës, u diskutuan çështje të rëndësishme si sfidat e kohës për Aleancën dhe rreziku i sigurisë nga Kina. Kryetari Gashi theksoi rëndësinë e investimeve dhe ndarjen e të paktën dy për qind të buxhetit të mbrojtjes për të siguruar qëndrueshmërinë dhe forcën e NATO-s në përballjen me sfidat globale.
