Ish-zëvendësdrejtori i Drejtorisë së të Ardhurave Publike (DSHP) Ismet Guri (60), i cili kërkohej me urdhër të Gjykatës Themelore Penale Shkup, sot në ora 13:40 është dorëzuar vetë në Shkup, konfirmoi Ministria e Punëve të Brendshme.
Sipas informacioneve, më pas Gurit i është hequr liria në Stacionin Policor Kisella Vodë dhe është dërguar në Burgun e Shkupit.
Ndaj Gurit në janar të këtij viti është lëshuar një urdhër ndërkombëtar pasi nuk u gjet në adresën ku ishte në arrest shtëpiak. Guri fillimisht ishte në paraburgim dhe më pas në arrest shtëpiak për shkak të problemeve shëndetësore pasi u arrestua në korrik të vitit të kaluar së bashku me 15 persona, mes të cilëve biznesmenë dhe inspektorë të DAP-it, të dyshuar për shoqërim kriminal dhe mashtrim tatimor.
Ndaj Ismet Gurit, së bashku me Ejup Alimin, për asgjësimin e materialit zgjedhor është zhvilluar edhe çështja “Titanik 3”, në të cilën Gjykata, pas një gjykimi të përsëritur vitin e kaluar, i ka dënuar me burgim nga tre vjet e gjashtë muaj.
Aktakuza për “Titanik 3” u hap në vitin 2017 nga ish-PSP. Ata akuzohen për veprën e shkatërrimit të materialit zgjedhor, përkatësisht se në zgjedhjet lokale të vitit 2013 kanë ndryshuar një pjesë të procesverbaleve të votimit në Çair. Guri ishte aktivist i shquar i BDI-së dhe pas ndarjes së Izet Mexhitit, ai iu bashkua Lëvizjes Demokratike.
